2026-жылдын 4–10-октябрь күндөрү И. Раззаков атындагы Кыргыз мамлекеттик техникалык университетинин делегациясы Венгрияда болуп, Мишкольц университетинде өткөн CECOL 2026 эл аралык конференциясына катышты. Конференцияга ар түрдүү өлкөлөрдөн окумуштуулар, окутуучулар, изилдөөчүлөр жана логистика тармагынын өкүлдөрү катышты.
И. Раззаков атындагы Кыргыз мамлекеттик техникалык университетине ректор Мирлан Койчубекович Чыныбаев башында турган делегация өкүлчүлүк кылды. Делегациянын курамында КГТУнун Эл аралык логистика жогорку мектебинин директору, профессор Акылбек Сапарбекович Уметалиев, ошондой эле КГТУнун окутуучулары, докторанттары жана магистранттары болушту.
Конференцияны КГТУнун ректору Мирлан Чыныбаев жана Мишкольц университетинин ректору Зита Хорват биргелешип ачышты. Өзүнүн куттуктоо сөзүндө КГТУнун ректору логистиканын, санариптик технологиялардын жана глобалдык жеткирүү чынжырларынын тез өнүгүп жаткан шартында эл аралык университеттер аралык кызматташтыктын маанилүү ролун белгиледи.
Конференциянын негизги багыттарынын бири Эл аралык логистика жогорку мектебинин өкүлдөрүнүн илимий программага активдүү катышуусу болду. Пленардык жыйында профессор Акылбек Уметалиев «Development of Cross-Border Virtual Logistics Centers (VLC) for Enhancing Transit Capacity and Promoting Agricultural Products of the Kyrgyz Republic in Global Supply Chains» аттуу баяндамасын сунуштады. Баяндама Кыргыз Республикасынын транзиттик потенциалын жогорулатуу, чек аралык виртуалдык логистикалык борборлорду өнүктүрүү жана өлкөнүн айыл чарба продукцияларын глобалдык жеткирүү чынжырларына чыгаруу маселелерине арналды.
Конференциянын тематикалык секцияларында КГТУнун окутуучулары, докторанттары жана магистранттары өздөрүнүн илимий изилдөөлөрүнүн жыйынтыктарын сунушташты.
Кристина Риферт жасалма интеллекттин өнүгүү шартында логистикалык билим берүүнүн трансформациясына арналган «Institutional Transformation of Logistics Education in the Era of Artificial Intelligence: A Multi-Level Framework» аттуу баяндамасын сунуштады.
Тынчтык Муканов Алмаз Кайырбеков менен биргеликте «Sustainable Water Flow Control in Irrigation Systems: A Logistics-Oriented Approach» аттуу изилдөөсүн сунуштады.
Нурзада Тойбаева Улан Эмилбеков менен биргеликте «Investment Attractiveness of Educational Programs in the Field of Logistics: ROI Analysis» аттуу баяндамасын сунуштады.
А. Акматова тоо-кен тармагындагы кооптуу материалдардын логистикасы жана экологиялык тобокелдиктерди башкаруу маселелерине арналган «Hazardous Materials Logistics and Environmental Risk Management in Mining: The Case of Sodium Cyanide at the Kumtor Mine» аттуу изилдөөсүн сунуштады.
Бактияр Аманкулов эки илимий баяндама менен чыгып сүйлөдү. Ал Гүлжан Асанакунова менен биргеликте логистика боюнча билим берүүдө практикага багытталган модулдарды киргизүүнүн экономикалык натыйжалуулугуна арналган «Economic Efficiency of Implementing Practice-Oriented Modules in Logistics Education» аттуу изилдөөнү сунуштады. Экинчи баяндамасы — «Supply Chain Consolidation of Electrical Materials in Residential Construction Projects: A Case Study from Kyrgyzstan» — турак жай курулуш долбоорлорунда электр материалдарын жеткирүү чынжырларын консолидациялоо маселесине арналды.
Ошентип, CECOL 2026 конференциясынын илимий программасынын алкагында кыргыз тараптан 7 илимий баяндама сунушталды. Алар логистикалык билим берүү, жасалма интеллект, жеткирүү чынжырларын башкаруу, туруктуу өнүгүү жана экологиялык коопсуздук маселелерин камтыды.
Эл аралык логистика жогорку мектеби үчүн өзгөчө маанилүү жыйынтык — сунушталган илимий макалалардын эл аралык Scopus маалымат базасында индекстелген илимий басылмаларда басылып чыгуу алдында турганы. Бул КГТУнун окутуучуларынын жана жаш изилдөөчүлөрүнүн илимий ишмердигинин маанилүү натыйжасы болуп саналат жана эл аралык илимий кызматташтыкты мындан ары кеңейтүүгө өбөлгө түзөт.
CECOL 2026 конференциясына катышуу КГТУ менен Мишкольц университетинин көп жылдык өнөктөштүгүнүн уландысы болуп калды. Бүгүнкү күндө эки университеттин кызматташтыгы логистика боюнча кош дипломдуу магистрдик программаны, академиялык мобилдүүлүктү, биргелешкен илимий изилдөөлөрдү жана PhD докторанттарын даярдоону камтыйт.
Иш сапардын алкагында Эл аралык логистика жогорку мектебинин өкүлдөрү Мишкольц университетинин Логистика институтунун профессорлору Петер Тамаш жана Петер Вереш менен жумушчу жолугушууларды өткөрүштү. Жолугушууларда кош дипломдуу программаны мындан ары өнүктүрүү, биргелешкен илимий изилдөөлөрдү жүргүзүү жана илимий кадрларды даярдоо маселелери талкууланды. Мишкольц университетинин профессорлору КГТУнун докторанттары үчүн онлайн лекцияларды үзгүлтүксүз өткөрүп, алардын илимий изилдөөлөрүнө жетекчилик кылууга катышып келишет.
2021-жылдан бери КГТУнун жана Мишкольц университетинин окутуучулары менен изилдөөчүлөрү тарабынан эл аралык илимий басылмаларда 20дан ашык биргелешкен илимий эмгек жарыяланды.
Эл аралык логистика жогорку мектебинин CECOL 2026 конференциясына катышуусу эл аралык илимий жана билим берүү кызматташтыгын өнүктүрүүдөгү маанилүү кадам болуп, МВШЛнын адистерди даярдоодо, логистика илимин өнүктүрүүдө жана эл аралык академиялык мейкиндикке интеграцияланууда активдүү ролун дагы бир жолу тастыктады.
